निरोप

निरोप
मी निरोपाच्या क्षणांना,
खिन्नसे हसणार नाही!
'तू मला विसरून जा'
हे विछिन्नसे म्हणणार नाही!
भिन्न वाटा आपुल्या'
अन् वेगळ्या आता दिशाही,
आपुले आकाश तरीही,
वेगळे असणार नाही!
पूस डोळे तू तुझेही,
मी निघाले दूर आता.
आसवांच्या ह्या धुक्यातून,
मी तुला दिसणार नाही!
आठवांची बकुळ सुमने
जपून सारी ठेवली मी
पाकळ्या गाळल्या तरीही
गंध हा सरणार नाही!
जे कधी विसरायचे ना...............
वेगळे ते का स्मरावे?
वेगळी मी उरली कुठे?.......
वेगळे स्मरणार नाही!